【客語文章】篇名：莧菜鬼 《海陸鄉野傳奇》（4） 作者：詹益雲 （海陸腔）

頭擺有法師會做妖法，佢先騙著隻細人仔正確个時正月日，就摎該細人个時正月日寫到一張紙寧去，捼（no）做一團，用紅布包寧，𠠝（làg）開一頭莧菜梗（guáng），摎紅布包寧个紙團揳（siab）落菜梗心肚去，莧菜緊來緊大頭，梗緊來緊粗。粗到摎紙團包塞塞，就摎菜梗𠠝（làg）開該節仔頭尾割下來，曬燥。梗緊曬緊燥，該細人仔緊來緊黃頭鉤嘴，菜梗曬燥，細人仔慢慢仔也就死忒，細人仔个魂魄分法師收落該莧菜梗裡肚去咧，法師隨身帶寧該截莧菜梗，就係講隨身摎細人仔个魂魄帶寧，該魂魄變成莧菜鬼，莧菜鬼就會摎某某人所有个祕密講分法師聽，法師就利用這莧菜鬼來害人賺錢。

【註解】1.時正月日：出生年月日時。

2.捼：搓

3.菜梗：菜莖。

4. 𠠝：切開。
5. 黃頭鉤嘴：面黃肌瘦的樣子。