我姐公（zia⁺ gùng）戴新埔大茅埔黃梨園半山排寧，我姆常會渡我拔（bàng）山去掌外家，我六歲時，我姐婆過身，過身無幾久，該年七月我爸也跈寧過身。過身前一駁仔，我姐公戴該公廳頭前，有頭毋知有幾多年个大樹死忒，六月響大雷公，bĭn lĭn biăng liăng，大樹分雷公攔腰仔打斷忒，大樹中央係空窿空殼个，無人知得該樹仔个樹心早就歿（mud）忒，窿肚囥條大蛇，大蛇分雷公打死，聽我姆講仰般个臭風，幾遠都鼻得著，味道毋知過幾久正散忒。
該時節，台灣光復無幾多年，還當戰亂，盡無好食，三餐食番薯籤過餐，投生（teu sàng）畜大，過年過節正有㓾（chi）來拜神，也正有好食。毋知仰般，有段時間，雞鴨常常無緣無故打毋見忒，係講狗擎去，乜會有雞毛，有血跡，又毋係賊仔來偷，賊仔係來偷，狗會吠啊，全無，該就奇怪哩唷，該兜投生會走哪去个著。大家滿片操光轉，還係無魂無影，看寧七月普渡愛㓾盡多投生，大家都無䈓無䉈，仰䈓䉈正好。
大樹死忒，雷公一打，樹仔斷忒，正知囥佇樹窿肚有條大蛇，該蛇從細細條變到恁大條，毋知經過幾多年，緊來緊大，大到愛雞鴨正食得飽，也係啦，喪忒恁多投生，食祿滿咧，分雷公打死，天收忒。自該條蛇死忒了後，投生就無過打毋見忒咧。
老古人講，屋脣大樹係突然死忒，有當家个人會過身，過無一個月，我姐婆就過身，果然講著著，毋知係恁堵好無？
【註解】
1. 姐公：外祖父。
2. 半山排：半山腰。
3. 前一駁仔：前一段時間。
4. 歿忒：腐爛掉。
5. 投生：牲畜。
6. 㓾：宰殺。
7. 滿片操光轉：到處尋遍。
8. 無䈓無䉈：無所適從，不知如何是好。
