細細時𠊎常會跈（ten）𠊎姆去看姐公，見擺𠊎姐公總係坐佇眠床唇交椅寧摎𠊎姆講閒談，去時，𠊎姆會買兜𠊎姐公好食个東西，像水粄，九層粄這兜點心。逐擺去看佢，佢都係擎支水煙筒佇眠床唇該交椅座寧㗘菸，該兩時𠊎正十空歲仔。煙筒頭輒輒愛換一細撮一細撮个菸草，底下係細水壺，細水壺个水乜愛常換。𠊎姆常會摎𠊎姐公換煙筒水壺个水，有時乜會𢯭換菸草摎𠊎姐公點菸。
聽𠊎姆講，有擺𠊎姐公閒閒坐佇廳下門檻頂𠽢佢个水菸筒，突然間看著兩三個舂拚，就係𠊎俚平常話會講，搶劫人个強盜啦。該兜舂拚行到廳下禾埕前大門時，𠊎姐公惦惦，詐無事人樣，毋聲毋聲，斯緊捉寧該兜舂拚看，全無徙位，也沒出聲。該兜舂拚看著𠊎姐公坐寧穩的的，仰全無驚个樣仔，毋像勢，走到尾瀉屎，以後也毋識聽講有人來搶咧！
聽𠊎三舅厥倈仔講，頭擺𠊎姐公後生時，禾埕前十張神桌排成一列，佢一躍（ciog）就躍過去，這事情𠊎姐公過後從來都毋識摎人提起過，連𠊎姆都毋知，這係𠊎表兄弟講出來个。
【註解】
1.㗘菸：抽菸 。
2.輒輒：經常。
3.惦惦：靜靜地。
4.詐無事人：裝作若無其事。
5.毋聲毋聲：不吭聲。
6.走到尾瀉屎：落荒而逃。
