文/詹益雲
細細時，我老屋對門山寧，有戶單家簷屋，戴寧个 （bù）娘人，降有三個倈仔，我俚會喊佢勝伯姆，佢係人个細姐，男 人另外有家竇，無共下戴。耕已闊茶園摎柑園，不管春茶、夏茶也係講白露筍，我姆都會去佢該寧摘茶，佢還耕有幾畐（fù）山田。以早戴茅屋，以後起過間磚屋，我還當記得，該茅屋重（chung）到怕有完尺賁（pùn）。佢識摎人講起，有擺炒菜時，火當猛，鑊（vòg）嬤當燍（lad），突然間，zĭ ziă聲，著下驚，原來係一條當長當大條个蜈蚣蟲得事，佢摎人講，假使係睡目時跌落眠床頂，該毋知會仰般。
該姓廖人家屋後背有歸排个綠竹，我做細人仔時，六七月係風差天，常會去摎該分風打斷忒長長个綠竹筍拉轉屋下做菜食。我聽我姆講，該搭綠竹園較早時，逐日到臨暗仔，就會聽著鬼噭个聲，該聲聽起來仰般淒人，常都有聲噭到無聲，噭又愛久，聽著雞嬤皮 （pŏng pŏng）起，寒毛菇都會撐起來，搣到戴該竹園下背个廖屋歸家人透暗晡都毋使睡，歸家人都會癲忒去。毋知過了幾多年，該聲正無忒去。
勝伯姆摎我姆講，以早有个 娘人，盡在過，常分老公打，家娘照倈仔轉，常乜蹧蹋酷毒（zàu tàd kù tùg）佢，佢一下閼著，想毋開，擎支刀仔佇該綠竹園割喉嚨頦自殺。極可能係刀仔毋利，割著又痛，割又無割利，痛到有聲噭到無聲，血出到忒正痛到死。死後痛苦个陰魂不散，逐日臨暗仔就會噭到天光，該噭聲，一直毋知經過幾多年正無過聽著。聽人講自殺个人會佇陰間受苦受難，盡難投胎轉世。該割頦鬼在生恁在過，到陰間也恁在過，正式毋知麼个命，前生毋知做麼个積惡，正會恁樣，實在還出差世哪！
【註解】
- 家竇：家眷。
- 幾畐（fù）山田：山田幾畦。
- 重（chung）到怕有完尺賁：一重一重差不多厚到一尺。
- 當燍：熾熱。
- zĭ ziă聲：油炸聲。
- 嬤皮 （pŏng pŏng）起：起雞皮疙瘩。
- 透暗晡：整晚。
- 蹧蹋酷毒：虐待。
- 在過：可憐。
- 出差世：命運不濟。
