我大舅後生時，常落山肚拔蛇藥，佢講，較好个蛇藥淺山無，愛深山正有。有擺佢落深山採藥時，看著一頭當大頭，當珍貴个蛇藥，毋過，當可惜，該頭藥草頭下有條當毒當大條个蛇掌寧，無法度兼身（giàm shìn）去採。可以知得，天下靈藥並毋係隨手可得，儘綵就可以得著个，除非你福德深厚，該藥草自有神靈守護寧，並毋係想愛就愛得著。該擺佢採藥無採成，空手轉時，佇隻窩壢（vò lag）个位所，看著山神堵佢頭林頂 （kiam⁺）阿過，該山神一隻腳踏寧這片山頭，另外隻腳踏對門山去，你試看阿哦，該山神有幾高大。我舅講佢看著時，登時跪下來就拜，該山神也無仰般人， 過一山又一山， 寧離開。
過忒幾多年了後，我大舅講佢又看著山神，佇佢黃梨園屋唇寧又看著山神腳踏一隻山頭，另外隻腳 過對門山去，一山過一山緊 寧過。佢講佢一生人兩擺堵著山神，逐次看著，佢都當虔誠跪拜，山神並無對佢仰般。奇怪个係，仰般講佢會看得著山神，其他毋識有人講看過山神个，人講十老九㶅梢（hau siau），毋知有影也無影，死無（vu）對證，毋過我舅講佢一生人都毋會亂講，毋會㶅㶅梢梢儘綵花花舌舌來騙人。
老人家常會講，舉頭三尺有神明，人上有人，天外有天，一般人平平凡凡過日仔，毋會感覺著有神明就佇我俚頭林頂寧，分分秒秒都注意寧我俚个一舉一動，我俚看毋著神明，並毋係就無神明啊，就像空氣樣，我俚一日到暗透氣，但是你毋會感覺著有空氣个存在共樣。又乜像電樣，看毋著，你試摸看看啊，看摸得無？我姆雖然講毋識字，佢會教我兜講天有天神，土地有土地伯公，山有山神，水有水神，海有海神，就係海龍王啦，天地萬物都有神明掌管寧，細到一花一木，大到天地恁大，無所不包，喊我兜做事毋好講看毋著神明，就違背良心來欺神，檢採係欺神，早慢會分神明責罰，走你都走毋去。愛像若大舅樣，一生人心存善念，毋梟人，毋批人，老老實實做人，正修得子孫滿堂，福祿雙全个善報，該係實實在在，騙人毋得个啊！
【註解】
- 兼身：近身。
- 儘綵：隨便。
- 窩壢：山谷。
- 阿過：跨過。
- 㶅梢：謊言。
- 有影也無影：是真或假。
- 花花舌舌：花言巧語，講話虛假不實。
- 梟人：欺詐。
- 檢採：假使。
- 毋批人：不占人便宜。
- 㶅㶅梢梢：虛假不實。
- 花花舌舌：花言巧語。
