頭擺，我做細人仔時，係有人過身忒，屋下人都會請仙嬤（ma）來，仙嬤來，佢會燒支香，香煙裊裊（niau⁺ niáu）通天庭，隔壁鄰舍，親朋好友圍圍秋來看問仙。以早个人屋都盡狹，屋肚除了屋下人也係講當親个人以外，其他个人大體都會佇屋外背企企寧看。仙嬤坐好勢，扶佇凳頂寧，屋家人就會開始問仙嬤，就係我俚常講个問仙啦，仙嬤就會學過身忒該人在生時个聲哨，大體會先喊過身忒該人个子女，親人，有時又乜會摎當熟事个人打招呼，講閒談，講兜在生時一兜生活小事。最重要个係屋下人因為思念過身忒个人，會問仙嬤一兜變仙以後在陰間過著仰般，在生个人以後會過得仰般。
當然啦，並毋係逐擺都問成功，常常乜一句話都講毋出來，該係盡輒常个事情。有兜仙嬤毋靈，毋過佢愛賺錢啊，係有人請佢去問仙，佢會先派人去打探過身忒个人佢屋下人个小名，做麼个生事，好食麼个，摎麼儕較相好等等，等到問仙該日，佢會用打探著个消息，係有人問起時，像人當識樣，講到有影有跡，屋下人摎圍圍寧來看个人全都分佢騙到信當當，話著該仙嬤恁靈恁慶个著，其實該全乜係佢先去打探來个資料。有時該仙嬤耳hiàg hiag緊聽外背有人細細聲講話喊人个聲，佢就跈寧該聲大聲講「阿英你也來唷！」，大家都話著（va⁺ do⁺）正經樣。
當然，也有正式會通靈个仙嬤，佢當慶，毋使打探，佢就有法度未卜先知，講到非常个準，向恁樣个仙嬤，滿片有人請，事（she⁺）做毋退，毋過像這恁識个仙嬤極少極少，到如今，已經無人做這種頭路，還較講無人問仙咧。我姐婆過身，我蘭姨摎我姆、我舅姆還過我滿姨湊寧去問仙，問仙時，該仙嬤摎我姆這兜人講，「你兜我都無愁，我斯愁阿爐頭，佢過了這七月初一正係人，」，我姐婆喊我爸「阿爐頭」，七月初一係講舊曆，意思係講我爸假使厾（dù）得過七月初一正有命，係過毋去，就無命咧。我爸果然七月初一該日過身忒去。
我爸過身了後，我姆又去問仙，該仙嬤摎我姆講，講我爸打早去摎我大姑蒔田，經過柑園崗大塚埔時分鬼拉寧走，該日我姆本來喊我爸毋好去蒔田，我爸強強愛去，我姆攔佢毋核，毋知係命生成（sàng shang）無，鬼仔牽寧行，擋乜無效。
【註解】
- 仙嬤：巫婆。
- 問仙：請教巫婆已逝者過世後瑣事。
- 變仙：指事事而言。
- 輒常：經常。
- 耳hiàg hiag：側耳傾聽。
- 話著：以為是。
- 正係：才是。
- 厾（dù）得過：撐得過。
- 蒔田：插秧。
- 大塚埔：大片之墳地。
- 生成：天生自然。
