民國40年代，國民政府撤退到台灣時，滿片都看得著阿兵哥（a bin ger），冷天時該兜阿兵哥全都著寧賁賁个大襖婆衫（o⁺ po sàm），我俚庄下人看著這兜兵仔就喊佢兜襖婆兵，又講佢兜係長山仔。其實，喊佢兜安著長山仔，有多少仔看輕人个感覺，講事實，我俚全乜係長山仔，除了原住民以外，斯不過來台灣个時間有早有慢定定。
該兩時煮食、暖水洗身毋係燒柴草（ciau có），就係燒石炭，我俚新埔个所在盡少有人燒石炭，大體都係燒柴，有兜人會燒vòi lă，該係日本話，又乜有人講炭丸（tăn rhan），就係用碾（chăn）碎个石炭做成圓圓，中央一空一空个磚仔，還吂有瓦斯，用電該就還較毋使講咧。
有年冷天朝晨頭打早，新埔街路寧來著隻襖婆兵，想愛買兜柴火煮飯洗身，人生路不熟，講个話又無相同，佢講个係原鄉北方个話，我俚新埔本地該兩時全係講海陸客，故所以，南腔北調，溝通實在講有較困難兜。佢問隻過路人，恁堵好，就戴這就近，「請問，哪裡有賣乾柴的（ná lì ió mài gan chái di）」，該隻本地人盡熱心，指寧路摎佢講「這條路徑直（dăng chìd）去，過條街，向左片行，第三間就係，貨當齊，麼个都有」。
佢照該本地人講个行阿行，行到該間店仔面前寧來，還恁早斯，門吂開，佢碰下門，店頭家出來開門。門一開，佢看著店寧歸間个棺材一副副，頓寧排到正正，頭家吂開嘴，佢就大罵「媽哩個逼，這哪裡是乾柴（ma li gèr bi，zhèr ná lì shiì gan chái）」，該頭家斯笑笑仔用客應講，「毋使比，毋使比，逐副（dàg fŭ）都係六尺四」。
【註解】
- 襖婆衫：棉襖
- vòi lă：日語，指用煤炭碾碎製成的煤炭泥球。。
- 炭丸：
- 徑直：直往。
- 媽俚個逼，這哪裡是乾柴：真他媽地，這哪是乾柴。
- 逐副：每副。
