客語長詩劇02 《遲來的親情》賴傳毓先生將客家美食融入勸世劇情的第二部，值得大家細細品味

作者：賴傳毓   苗栗縣客家人（四縣腔）

祖先香火世代傳 創作堂號百百個
堂號子孫傳倫理 爺娘子女共來守
三字經講人之初 性本善來傳千秋
爺娘子女血脈連 親情緣份最可貴
人講生活在仙境 一定前生燒好香
前面看海後靠山 竟有此景東大港
港口中間有條街 街面闊闊盡鬧熱
街名喊做港中街 歸條街路直又長
兩片看到屋盡多 各行各業店號開
港中街來行到尾 就會感覺無鬧熱
因為既經堵山壁 右轉就來繼續行
開始愛來行山路 行來大約一公里
來到大山半山排 黏時目珠擘大大
再行親像田脣路 但係右片無共樣
看著一棟派頭屋 分人看到目金金
外形看來像城堡 派派頭頭盡餳人
這屋喊做槐琪堡 東大港肚盡出名
頭家喊做宋亦槐 夫人喊做施夢琪
頭家利用東大港 生理做到當成功
夫人有名美食家 名聲紅到外國去
夫人定時辦活動 公開徵求好料理
若係夫人有中意 做得得著大紅包
但係訂了兩規矩 定著在這堡內煮
料理食譜愛留下 交接夫人仰般煮
今日堵好活動日 管家帶入一儕人
後生細妹生來靚 年紀吂到三十歲
帶到灶下開始煮 管家灶下行出來
緊行緊想這細妹 做麼个恁像夫人
細妹在灶下無閒 抺抺摸摸幾點鐘
煮出二十四樣菜 煮好強強就離開
留下食譜書一本 官家拿起打開看
書名寫四炆四炒 二十四樣菜名稱
合等相片來對照 食材名稱調味料
做法順序當清楚 再分傳統摎創意
第三就係齋料理 管家趕緊尋夫人
親手奉上該食譜 夫人詳細看內容
看了就來問管家 佢有瞭解規矩無
管家表明詳細講 乜有留佢等夫人
佢就強強要離開 夫人吩咐照順序
摎菜兜到餐廳去 再來吩咐請頭家
餐廳面前坐下來 詳細來看逐樣菜
緊看額頭就緊皺 客家个四炆四炒
逐項就來先品嚐 緊食頭那就緊點
還恁後生就恁慶 基本功夫有練好
毋知係哪大師父 教出這個好師仔
再問管家厥名姓 管家講係楊嘉華
夫人聽著大著驚 恬恬坐等流目汁
管家承勞看頭家 大家心肚盡緊張
毋知發生麼个事 管家行到頭家脣
暗示頭家行前問 頭家行前來關心
到底發生麼个事 夫人慢慢講原因
夫人先嫁楊松柏 降了妹仔楊嘉華
為著愛做美食家 攉忒老公摎妹仔
去到法國來學習 學了兩年轉臺灣
第一先尋兩子爺 想愛好好會失禮
發覺既經徙離開 只好暫時戴在這
先到一間大飯店 尋著一個好頭路
一片做事一片尋 希望做得來團圓
尋來尋去過一年 想盡辦法來打探
就是無人有消息 下後認識宋亦槐
輒常帶人來飯店 在這食飯講生理
亦槐夢琪漸熟事 一日亦槐來講親
夢琪愐著兩子爺 尋了恁久尋無著
正來答應宋亦槐 婚後離開南河鎮
共下來到東大港 今日這隻細妹仔
應當就係吾妹仔 大家聽得恬肅肅
夫人忽然擎起頭 目珠擘金問管家
有留厥个住址無 管家頭磬磬緊搖
頭家搖頭㰴大氣 管家遽遽來解說
細妹強強毋肯留 夫人大喊一長聲
跈等橫在地泥項 儕儕看著大著驚
遽遽電話請醫生 過無幾久夫人醒
目汁含等來吩咐 東大港肚詳細尋
尋了歸日無尋著 臥起頭那大聲問
阿姆誠心來求你 頭擺係 昶自私
毋敢求你來原諒 只求分 有機會
來補償若个傷痛 頭家行前來安慰
夫人切莫忒傷心 總愛煞猛四處尋
皇天不付苦心人 總有一日會尋著
一日夫人早䟘床 行到陽台看日頭
又來想起河南鎮 當初離開河南鎮
離開時妹仔還細 這下應該二十五
生活毋知好毋好 低頭道嘆行入屋
換好衫褲行出門 行去碼頭來散心
欄杆面前長凳板 看等面前發琢愕
ㄧ個後生細妹仔 對厥面前行過去
夫人著驚遽遽喊 嘉華嘉華你莫走
細妹仔斡轉頭那 看著夫人乜著驚
但係跈等跋腳走 夫人根本跈毋著
只好斡頭轉屋下 又再喊人出去尋
毋過尋了一隻月 還係無法尋著人
佢係有心愛閃你 俚絕對尋毋著
夫人港口看到佢 怕係跈等就離開
無定著係轉老屋 賭造化去尋看哪
毋知夫人仰般想 夫人目珠盯等看
若係尋著吾妹仔 你會仰般來處理
夫人做你放寬心 會當做吾妹仔
不仿再去河南鎮 毋過堵好 無閒
指派兩儕跈你去 係講還係尋毋著
就愛跈等回轉來 吩咐管家帶承勞
三儕來到河南鎮 先去老屋試尋哪
尋無就來四周尋 街頭巷尾尋七日
還係尋無真怨嘆 擎頭向天來跪拜
求天分 有機會 還 妹仔來補償
管家承勞勸夫人 暫時先轉東大港
正來過再想辦法 夫人轉到東大港
歸日恬恬毋講話 坐在陽台看海港
輒常ㄧ看就半晝 屋下無人勸得成
有日食夜个時節 管家建議登報紙
試看係毋係有效 頭家頷頭看夫人
夫人失神望天頂 想了當久正頷頭
頭家吩咐買廣告 選了盡大十大報
登出尋人个廣告 ㄧ連登載歸隻月
等到夫人頭那白 還係失望無消息
頭家十分愁慮佢 吩咐管家愛顧好
日仔過了有罅遽 毋多知仔就過年
初三打早管家尋 煞煞奉上ㄧ封信
夫人打開額頭皺 抽出一張邀請函
詳細看後發琢呆 內容係美食發表
日期係佢个生日 主持人係厥妹仔
尋上尋下尋了尋 一直尋無个妹仔
竟然恁樣來見面 總算等到日期到
公婆打早準備好 共下來到該會場
看著一個細妹仔 招待前來个來賓
夫人詳細看分明 毋像自家个妹仔
雙手接過邀請函 細妹仔擘大目珠
端細看這兩公婆 黏時帶到貴賓室
摎嘉華好朋友 兩儕認識會十年
前幾日摎 聯絡 臨時有事行毋開
邀請函既經發出 託 代佢來主持
特別交代厥阿姆 安排愛坐貴賓位
頭家就問厥住所 既經會有一年
無堵著佢無聯絡 故所乜無厥住址
夫人低頭大失望 忍毋核目汁雙流
頭家寫聯絡資料 公婆拜託 手尋
兜既經尋當久 順續討對方資料
扼手承蒙來 手 有閒歡迎過來尞
感謝過後就離開 轉來屋下心情差
有閒時節帶夫人 出去外背散散心
某日暗晡食飽後 管家奉上一封信
肚項寫明邀請事 三年一擺个比賽
創意料理个比賽 邀請夫人做評審
時間選在清明後 比賽日仔當遽到
夫人準時到會場 參加比賽十儕人
觀眾朋友坐淰淰 比賽題目三種菜
前面兩樣評分完 宣佈第三樣菜名
夫人觀察比賽者 忽然看著觀眾肚
一個後生細妹仔 感覺當像厥妹仔
細妹仔乜有發覺 自家既經畀看著
遽遽䟘起行出去 行路姿勢像老人
夫人當想逐出去 但係比賽吂結束
做毋得離開現場 等到比賽結束後
夫人遽遽行出去 東南西北四處看
路上行人有盡多 就係看無細妹仔
又來目汁含等轉 頭家詳細問管家
管家詳細說分明 又來特別來提出
這擺看著細妹仔 面色毋好行路慢
毋敢再講看頭家 夫人低頭流目汁
你做麼个愛閃𠊎 你係毋係著著病
拜託分𠊎來補償 拜託分𠊎照顧你
頭家遽遽來安慰 吩咐大家愛注意
留意夫人个安全 日仔一日一日過
但係過無幾多日 管家接著一電話
竟然係病院打來 重症病人楊嘉華
盡背尾想看阿姆 夫人聽得就昏忒
這擺親像毋好救 頭家考慮有盡久
安排夫人同細妹 共間病院共病房
當然醫院無答應 夫人轉屋就來做
妹仔好食个水餃 為著愛講求營養
夫人特別來變化 水餃皮來再加料
王梨蕃瓜又艾仔 肚項內容乜變化
鹹菜牛肉加蝦米 加上香菇共下炒
包好煮熟就裝盒 鹹菜覆菜係夫人
特別秘方親手配 故所妹仔當好食
加上日本照燒醬 經過特殊改變後
還較餳人來搶食 來到醫院看妹仔
看到阿姆行入來 嘉華面就來𢳆開
夫人看著無奈何 嘉華噭等罵阿姆
既然當年攉忒𠊎 做麼這下又尋𠊎
哪位尋𠊎𠊎乜知 𠊎就挑挑來囥忒
這擺病院个規矩 定著愛有屋下人
辦理歇院个手續 不得不來勞攪你
夫人恬恬無講話 再問若爸好毋好
為了畜𠊎勞累死 完全係你害死个
目汁含等張水餃 兜到嘉華病床前
嘉華右手掊一下 又來大聲罵阿姆
𠊎既經拒絕食這 講完嘉華透大氣
緊來緊急面色白 遽遽去尋護士來
護士看著鬥氧氣 測量嘉華个血壓
測完轉身尋醫生 醫生檢查完情況
同佢吊起大笐射 再請夫人行出來
病人病情無盡好 癌症末期盡衰過
存著日仔無幾多 屋下人愛有準備
病人現下需要靜 無好再來刺激佢
恁樣病情會惡化 夫人聽得盡傷心
十分無奈轉屋下 歸日都額頭結結
七日後病院通知 嘉華既經過身了
夫人聽著橫落地 急救一日命歸西
頭家傷心辦後事 決定兩人埋共下
親情關係盡寶貴 綿延到今幾千年
勸君毋好來打壞 公婆結親共相守
毋好為己攉子女 係無家庭就會苦
有親有情就幸福 無病無疼最滿足

客家四炆摎四炒 簡單紹介分你知
炆炒養育代代人 炆係講大火煮欸
再用細火慢慢燉 炒係講大火快炒
傳統用料看環境 炆菜用料無複雜
三層豬肉加豆油 就來做出炆爌肉
乜有加入竹筍乾 豬肚切皮摎鹹菜
鹹菜食油加豬肉 炆出鹹菜炆豬肚
菜頭切皮摎排骨 炆出排骨炆菜頭
竹筍曬乾切細皮 加上細節个肥腸
炆出大腸炆筍乾 香料配料講人用
主要湯愛有油氣 炆菜除忒炆爌肉
湯頭就用該肥湯 老古時節做苦事
需要油氣保體力 較特殊个炆爌肉
並無用著該肥湯 炒菜用料較複雜
客家炒肉有多種 各家用料無共樣
但係變化無盡多 基本材料燥魷魚
豆干芹菜三層肉 蔥節豆油共六種
炒出客家个炒肉 薑母洗淨切兜絲
大腸去油切細節 先用油炒香薑絲
再來加上鹹菜頭 包尾大腸共下炒
炒出薑絲炒大腸 鴨血切垤加韭菜
炒出鴨旺炒韭菜 豬肺王梨炒木耳
豬肺王梨要切垤 就摎木耳共下炒
炒出王梨炒木耳 創意四炆摎四炒
變化材料求好食 增加材料千百種
炆爌肉改炆豬腳 創意鹹菜炆豬肚
薑麻絲改碎金桔 創作豬肚新味道
創意排骨炆菜頭 加鹹菜沫味道好
創意大腸炆筍乾 筍乾雞皮肥豬肉
筍乾食油加雞皮 炆出大腸炆筍乾
客家小炒加蔥頭 燥魷魚換鎖管仔
再來加百葉豆腐 炒出創意个炒肉
薑麻洗淨切像絲 大腸洗淨來剁節
鹹菜梗摎黃豆醬 盡尾一粒檸檬水
乜有使用米豆醬 炒出大腸炒薑絲
香菇蒜頭紅蘿蔔 做出鴨旺炒韭菜
豬肺王梨炒木耳 豬肺改做豬腿肉
增加紅蘿蔔擐味 風味無改真好食