【客語文章】篇名：拜伯公 《海陸鄉野傳奇》（5） 作者：詹益雲 （海陸腔）

5.拜伯公  海陸鄉野傳奇 詹益雲

頭擺我做新竹縣美術協會總幹事時，有年會員聯展，苗栗名水彩畫家張秋台校長來到會場，講閒談，講起兩首童謠，佢唸分我兜聽，仰恁搭句个著，童謠中有提著「打鐵坑」，我突然間想著，「打鐵坑」係我老屋啊，佢仰會講著「打鐵坑」？該兩時我姆還戴老屋，我轉去摎這兩首童謠講分我姆聽，我姆聽了笑到會死。佢講，還發冷（bòd làng），該係我俚坑口山排頂何松嫂拜伯公摎伯公講个話啦。有年六月何松嫂屋下割禾，佢去伯公下拜伯公時，一片拜，一片摎伯公講：

伯公伯婆，我今晡日割禾，

我想愛打粄圓，又無人閒，

我想愛打粢粑，又無廳下，

我想愛打米篩目，又無人摝，

隨隨便便兩盤麵，

儘儘採採兩隻毛蟹，

打鐵坑，半山排，

何松嫂，就係我。

講束，佢詐無事人，金燒燒哦，無過加講咧，牲儀擐寧就轉。吂知佢請神無（vu）意中講个話，人講，說者無意，聽者入耳，傳到歸庄人都知。結果，一庄傳過一庄，一鄉傳過一鄉，傳到隔壁縣去，傳到全省滿片人都知，最尾又傳轉我老屋寧來，想起來，還生趣哪！

另外一首也係拜伯公个事：

蒔（shi⁺）田頭䫈䫈（cĭm cĭm），我老公安到楊阿鼎（dín），

金香並蠟燭，崁頂係我屋，

粢粑（ci bà）搵米麩（fù），我家娘安到阿梅姑，

兩个妹仔走相趜，

大个喊阿英，細个喊阿菊。

你試著生趣無？

【註解】

1. 搭句：押韻。
2. 還發冷：好無趣。
3. 詐無事人：裝作沒這回事。
4. 割禾：割稻。
5. 擐寧：提著。
6. 滿片：到處。
7. 頭䫈䫈：低著頭的樣子。
8. 米麩：一般用花生粉。
9. 走相趜：賽跑、追逐。