【客語文章】篇名：𩚬鬼（iàu gúi） 《海陸鄉野傳奇》（7） 作者：詹益雲

番婆哥係我叔伯阿哥，我南伯大个倈仔，人生來高溜（liù）高溜，講幾瘦也毋會啦，買隻妹仔，身下降著兩個妹仔，無倈仔，屋下常畜有兔仔，歸屋盡臭，毋過，鼻慣，也就鼻毋出麼个味道來咧。

番婆哥耕已闊（fad）園，全係果著園，賺盡成（shang）錢，生活豐湧豐湧，請有兩個長年仔來𢯭手。我叔伯阿嫂盡利斗，逐日，雞吂啼，狗吂吠，長年仔就分佢喊起來做事。該兜長年仔恁早就分人追亢起來，心肝一肚懊躁（ău cău），我叔伯阿哥挶頭家派頭，毋識落身上山去做，去巡看啊，這兜長年仔並毋係戇仔，去到山頂果園毋做事，挑挑摎大石鼓翻下崩崗去，翻到lĭn lĭn lŏng lŏng，當響，不過斯做膣（zhì）做樣，表示佢兜當煞猛，當當佇（dŭ）該做事。好得會天光咧，係無，吵死人，我俚帶唇頭，仰會睡得。這係我做細人仔時最記得个事，到今想起來，還試著盡生趣。

有擺，我叔伯阿哥食飽夜咧，隔壁人做完工拜伯公，煮粄圓請人客，佢過去行行仔，坐尞，打嘴鼓。隔壁頭家問佢食飽吂，還春有粄圓，問我叔伯阿哥愛分佢請無，佢講佢正食阿飽，吂會𩚬斯，頭家又講，係食得落，就毋好客氣。我叔伯阿哥碗拿起來，連咈（fùd，猛吃）九碗，佢偷偷摎人講，「敗勢，毋敢過張，其實，我還當想愛食，我還吂食飽斯！」。過後，佢摎人講，佢一生人毋識有食飽過。

佢過身愛還山該日，一般照禮規，愛辦牲儀，像雞、鴨、魚仔、摎魷魚這兜來祭拜，佢个喪事係分生命禮儀社包辦个，該禮儀社个頭家講，昨晡日牲儀就拜忒啦，今晡日並無包含牲儀啊，哪走來个牲儀，你這下加錢乜買毋掣啦，就恁樣簡簡單單用齋果來祭拜，喪家想噭乜（mĕ）噭無目汁啊，就因為喪家想愛省錢（sang⁺ cien），無摎該筆牲（sèn）儀錢算落去，禮儀社个頭家係生理人，正無加準備牲儀哪，係你會恁戇無？

總講一句，命啦！，一生人從來毋識食飽過，就連愛過身還山咧，都無好食飽，你講哪！係毋係𩚬鬼再世！

【註解】

1. 𩚬鬼：餓鬼。
2. 高溜（liù）高溜：高挑的樣子。
3. 賺盡成（shang）錢：賺蠻多錢。
4. 豐湧豐湧：生活優渥的樣子。
5. 利斗：精打細算。
6. 雞吂啼，狗吂吠：指天未亮。
7. 懊躁：氣惱。
8. 落身：親自參與加入工作行列之中。
9. 長年仔：長工。
10. lĭn lĭn lŏng long：石頭滾動聲。
11. 做膣（zhì）做樣：裝模作樣。
12. 打嘴鼓：聊天。
13. 連咈：連吃。
14. 還山：出殯。
15. 噭無目汁：欲哭無淚。
16. 生利人：商人。
17. 牲儀：雞鴨等祭品。