文/詹益雲
我姆頭擺識摎我兜講，佢吂嫁人時，巨埔庄肚有個阿婆屋下三代堅持食清齋，該係非常無恁容易个事情，佢子孫滿堂，食到當長壽。
有日，佢食飽夜，身腳洗淨，衫褲換好，佇廳下交椅寧，坐到正正，摎全家人喊兼來，又摎大家講佢壽年到咧，佢愛轉咧，吩咐大家毋好吵佢，毋好噭，毋好汀動（tìn tùng）佢，三日三夜過後正摎佢打下地泥下寧來，講煞，就過身忒咧。頭擺个禮俗，人過身了後，愛停到廳下地泥寧，選隻良時正入殮。該阿婆過身了後，歸隻廳下都鼻得著像檀香樣香香个味道，三日三夜過後正打下地泥下等寧入殮。
該阿婆過身還山了後，厥薪臼毋肯繼續食齋，齋就恁樣破忒咧！
【註解】
- 清齋：純吃素，不吃雞蛋等食物。
- 汀動：動。
- 薪臼：媳婦。
