客語長詩劇03 《飯桌面頂个風雲》 文/賴傳毓（四縣腔）

飯桌面頂个風雲    作者/賴傳毓

貪字害人ㄧ生人 後果並無好報應
善良做事能心安 乜就係善對自家
善良對人得善報 正所謂善有善報
人間仙景仰般來 就靠善字打天下
眼前風景盡餳人 一片歸路種松樹
一片總下山茶花 加上鐵路做大站
懷安市就變鬧熱 飯店旅館等路店
一間開過又一間 兩個厚生細妹仔
來開該懷客餐廳 開在車頭正對面
餐廳菜色長透變 口味乜有特別味
逐日當晝摎暗晡 餐廳罕得有閒桌
懷客餐廳兩姊妹 兩儕係叔伯姊妹
姊妹出身客家庄 兩儕從小好煮食
阿婆教煮客家菜 阿姆教煮新觀念
兩儕開店正愐著 做食這行愛做久
菜色一定愛變化 為到時時能變化
決定輪流外背尋 尋到客家特色菜
黏時帶轉餐廳肚 大家共下來研究
兩姊妹管理方式 獎勵開發新菜色
傳統客家老古菜 又油又鹹係特色
當時絡食做苦事 這下環境無共樣
養生觀念當時行 為了人客个康健
兩姊妹煞猛研究 少油少鹽客家菜
人客食到笑瞇瞇 再來創意百百種
樣樣菜色就餳人 儕儕食了盡阿惱
餐廳逐日人尖人 客家傳統个封菜
創意變化百百種 封菜意思簡單講
食材塞絞碎豬肉 再加上特別配料
就是傳統客家菜 變化封菜漸漸多
做出客家創意菜 封菜食材盡多種
冬瓜苦瓜白蘿蔔 青椒番茄燥香菇
千變萬變講人變 香料配料用得著
料理方式係堵好 封菜實在就餳人
懷安車頭乜鬧熱 行出行入盡多人
今晡日正月十五 火車停在懷安市
行出一位細妹仔 名姓喊作李芸蓮
職業乜係開餐廳 芸蓮剝下烏目鏡
周圍環境詳細看 忽然眼神停下來
緊看等懷客餐廳 揙開手項个雜誌
裡背報導這餐廳 菜色風評當湛斗
美食雜誌輒輒誇 故所前來開眼界
芸蓮來到餐廳肚 先看餐廳个裝潢
續下就係來點餐 點餐毋看該菜單
全用雜誌推薦菜 服務生感覺奇怪
跈等報告兩姊妹 兩姊妹來到櫃檯
煞煞端詳李芸蓮 年紀大概係中年
吩咐大家認清楚 若有無合理要求
跈等就愛來報告 假使再來愛注意
兩姊妹管理方式 所有員工就阿𧩣
鼓勵開發新菜色 開發成功有賞金
又安排灶下師傅 大家輪等外背尋
ㄧ方面四處旅行 順便來尋客家菜
特別傳統客家菜 食材味道煮食法
寫出心得帶轉來 大家共下來參詳
仰般變化來創新 做出創意客家菜
毋係平白梟人个 故所時時就推出
創新客家新料理 難怪人客來無停
時間又再過半年 芸蓮又再來餐廳
外勤員工當緊張 這擺點餐較古怪
所點个菜做兩份 其中一份愛打包
姊妹試著當狐疑 范雲梅年紀較大
吩咐老妹范香萍 芸蓮離開个時節
調查這人个資料 調查三日有結果
香萍定定講分明 原來芸蓮係共行
自家乜係開餐廳 生理無講盡鬧熱
美食雜誌輒紹介 懷客餐廳个料理
心肚實在毋爽快 最先係想來打探
下後開始買轉去 詳細研究仰般做
認為已經瞭解後 乜來做出共樣菜
餐廳生理開始好 兩姊妹心肚盡譴
起勢想解決辦法 香萍先吩咐灶下
新開發个三樣菜 暫時無愛兜出場
三日三夜想毋出 兩儕歸日額結結
灶下主廚看在眼 就來試問兩姊妹
自家想著个辦法 現在無用味素煮
全用別个材料配 𠊎突然想著辦法
摎所有調味材料 分開焙燥再磨粉
愛用時節正加入 恁樣佢盡難瞭解
有該味無該食材 佢應該當難想著
三人互相看一下 緊點頭那當讚成
開始試驗這辦法 香菇蒜頭紅蔥頭
薑嫲蝦公全全試 先對三樣新菜式
尋出可用个做法 尋出適當个用量
明細寫到食譜肚 毋過香萍無笑容
芸蓮毋係長透來 一定愛留調味粉
防佢來時無好用 平常煮法照舊煮
又怕放久會壞忒 盎仔愛標明日期
討論保存期限後 規定保存个期限
期限會到就用忒 跈等黏時重新做
避免食材个浪費 日仔一日過一日
姊妹兩人再輪流 滿哪來尋新想法
一擺堵著李芸蓮 警告創新自家想
無好懶尸偷人个 姊妹兩儕緊研究
總愛開發新菜色 交分灶下來試煮
平常煮法愛出來 讓餐廳繼續下去
粉仔煮法愛出來 防止有人再來偷
有日雲梅在櫃檯 聽著人客打嘴鼓
客家菜當油當鹹 無符合這下生活
又對人體有傷害 故所無點傳統菜
雖然看著盡餳人 為著康健个人生
還係莫食有較贏 雲梅聽著感覺深
雖然毋係講懷客 因為懷客有注意
還係遽來尋阿姊 尋到阿姊同主廚
講明人客个想法 掀開餐廳个菜單
三儕詳細來討論 尋出理想个配方
因為人客百百樣 當難符合儕儕人
有人愛食傳統味 有人愛食較淡味
包尾解決辦法係 逐樣菜色煮兩種
減鹹少油仰般煮 傳統口味仰般煮
尋出孔竅做標準 師傅兩樣愛會煮
結論菜單重新印 點餐時節問分明
註明人客个口味 好分人客食納意
希望逐儕就滿意 有日暗晡打烊後
兩姊妹集合師傅 共下討論新菜色
香萍堵著个封菜 冬瓜切到一小圈
在中挖忒塞餡料 豬肉絞幼加豆油
撚撚擲擲較好食 接下來係𤐙香料
蒜頭洋蔥加香菇 𤐙香後就加豬肉
共下炒香做餡料 塞入冬瓜個中央
冬瓜蒸熟無刨皮 愛食正來刣外皮
這種封菜當湛斗 希望大家來創新
調配適合个滷汁 用來蒸熟生冬瓜
豬肉絞幼撚擲過 再用特殊滷汁滷
冬瓜一圈改小垤 每垤中間挖窟仔
塞入香料再淋湯 討論結果恁樣做
剩下研究兩樣汁 一樣愛滷豬絞肉
一樣愛滷冬瓜封 客家子弟趙師傅
忽然提出新方案 大家目珠擘大粒
冬瓜改豬籠粄皮 一個一口堵好食
毋過這種係燥个 決定兩樣都生產
新菜列入菜單後 當遽就變熱門菜
有日有人來採訪 表明係美食雜誌
特別指定新菜色 新个一期專門刊
芸蓮看著譴入骨 雜誌主筆乜有來
就係毋肯誇菜色 𠊎个菜色恁差嘎
當遽芸蓮又再來 專點新出兩樣菜
外場報告分灶下 灶下照用調味粉
這擺食完就離開 並無再帶一份走
因為芸蓮發現著 點个共樣一項菜
厥个就係無共樣 店家已經在防个
轉來餐廳就盡譴 餐廳主廚魏凡天
詳細來問頭家娘 麼个事情來發閼
芸蓮詳細講分明 主廚恬恬仔來聽
跈等安慰頭家娘 對方毋識看過𠊎
這擺換𠊎去見識 希望帶轉好消息
芸蓮擎頭看主廚 含等目汁緊點頭
凡天擇日擇衫褲 派派頭頭去懷客
看了菜單開始點 點著三樣新出菜
外場領班遽報告 兩姊妹吩咐灶下
兩姊妹來到櫃檯 定定觀察這儕人
過無幾久轉灶下 摎主廚共下討論
結論認為這個人 可能係芸蓮个人
決定就用調味粉 煮好兜到該張桌
揙來揙去食了食 從頭到尾額頭皺
兩姊妹看了之後 行入灶下講分明
大家聽煞大道嘆 做麼會有垃圾人
毋肯實實在在做 打烊過後轉間房
香萍看著雲梅姊 無安無樂看外背
香萍詳細問原因 最近發生个事情
好在大家盡團結 故所想愛辦旅行
餐廳員工全部去 三日兩夜个時間
餐廳歇睏貼公告 大家好好出去尞
頭一日食晝時節 附近坐等一儕人
目珠緊看兩姊妹 又用相機來翕相
主廚發覺這儕人 跈等細聲來警告
再來換過位仔坐 暗晡食夜又看著
毋過這擺係兩儕 大家特別來注意
話講這間餐廳菜 不久兜出飯前菜
兩盤烰過油錐仔 麵粉做好入油烰
做个形仔當多種 大細就像番豆莢
酥酥脆脆當好食 忽然雲梅看香萍
兩姊妹又看主廚 主廚細聲來吩咐
轉去餐廳後正講 暗示還有人在看
轉到餐廳第二日 兩姊妹行到灶下
該間餐廳个前菜 單用麵粉入鑊烰
𠊎想裡背塞料仔 有鹹有甜做記號
毋知你兜个想法 香萍主廚就點頭
三人共下來試做 紅豆綠豆來捶綿
加上乳油三種甜 豬籠粄客家粽料
就係前菜个鹹味 試到滿意就決定
ㄧ桌鹹甜各一盤 前菜事情處理好
雲梅行出餐廳外 伸腰擎手敨口氣
忽然一台廂仔車 停在雲梅个身邊
當快跳出兩儕人 就將雲梅捉上車
黏時就離開餐廳 食等前菜个香萍
發覺無看著阿姊 領班看著行出去
香萍行出外背尋 附近緊尋就尋無
香萍開始愁阿姊 香萍召集全員工
共下來想仰結煞 盡尾還係來報警
警察調用監視器 雲梅出現開始看
突然一台廂仔車 停到雲梅个脣巷
跈等廂仔車離開 雲梅已經無看著
好得車號當清楚 根據車號開始尋
主廚忽然看香萍 出去旅行个時節
𠊎兜看著該兩儕 李芸蓮來偷食譜
毋成就換別儕來 恁多事情真怪奇
承辦警察記下來 做為辦案个參考
承辦警察離開後 香萍留主廚參詳
講出自家个想法 𠊎感覺該兩儕人
就係主要陰謀人 員工大家都看過
外場一日輪一儕 輪完換輪一師傅
師傅一儕輪完後 再輪轉外場員工
輪著愛做个事情 警察看著个車號
旅行看著个兩儕 係有看著愛翕相
黏時帶轉餐廳內 觀察對方个時節
一定愛注意安全 幾日過後有答案
警察注意个車號 大家看著該兩儕
出現對方个餐廳 香萍將這兜資料
提供分辦案警察 承辦警察再分析
開始派人來監視 竟然看著該台車
車肚出來該兩儕 警察跈等圍上去
捉轉懷安派出所 嚴厲質問兩儕人
上禮拜有無過去 懷客捉走范雪梅
兩儕搖頭毋承認 警察再問廂仔車
車號車主係麼儕 其中一儕就承認
警察跈等放影片 一截兩儕个背影
一截兩儕个正面 兩儕捉著范雲梅
強強𢱤入廂仔車 兩儕看著戇忒了
證據放在目珠前 警察再問重要題
范雲梅這下在哪 兩儕互相看一下
捉著交分李芸蓮 警察將兩儕關押
又來申請搜索票 先詳細問李芸蓮
李芸蓮全毋承認 警察開始詳細尋
尋了盡久尋毋著 忽然發覺李芸蓮
表情個樣看右片 警察跈等右片尋
發覺還有地下室 濕烏暗壁角一頂床
面頂睡等一個人 一個後生細妹仔
發覺已經失魂了 黏時就喊救護車
這個後生細妹仔 就係懷客范雲梅
該日芸蓮捉雲梅 要求互相來交流
有錢應當大家賺 希望分享特色菜
仰般料理个食譜 雲梅硬殼毋肯講
故所關等來苦毒 警察聽到這番話
搖頭想罵李芸蓮 做人無情手段毒
用殺人罪送法辦 醫院傳來壞消息
雲梅傷重救毋轉 無奈通知范香蓮
懷客餐廳儕儕噭 就問上天麼个理
人生道路百百條 想愛成功愛打拼
選擇歪路係做得 還有麼儕愛認真
老打老實行正路 煞猛打拼求進步
正正當當來做人 定著會有好結局