頭擺日本時代，我上屋姓呂人，大耕大種，耕當闊（fad）田，自家做毋去，大部分贌（piòg）人耕，斯打淨收租，收入就不得了咧。有一冬，一隻佃農㧡（kài）一擔穀來繳租穀，該佃農㧡寧來頭家這半山排寧，仰仰㧡到氣扯氣急，上氣毋接下氣，大汗潑小汗正㧡到來。過了兩日，該姓呂个頭家摎該佃農講，你欠我个一擔租穀仰還吂分我，該佃農講，我前兩日毋係有㧡分你咧乜，你仰賴我無繳分你。該兩時，一擔穀係經過千辛萬苦正得來个，佃農仰會甘願過了（liau⁺）加一擔穀。一儕講有，一儕講無，兩儕詏（ău）起來，調解毋下，結果，兩儕就請人寫黃榜（vong bóng），到新竹城隍廟該寧去燒黃榜，咒膏肓誓（zhiŭ gò mò shi⁺）。
咒了該日下晝，頭家轉轉（zhon⁺ zhón）屋下毋知係良心發現無，也係講突然間想起來咧，前兩日該佃農確實有㧡擔穀來繳租啊，佢就摎該寫黃榜个先生講，佢想起來咧，該佃農確實有繳租穀，拜託先生過（gó）寫黃榜去城隍爺該寧，摎城隍爺講，佢想愛收轉該黃榜，城隍爺廟个廟公摎佢講，黃榜燒忒該下，榜文就送到天庭去，收毋轉來，頭家正知差咧，貓舐朘（ngiău shè zòi）樣，行寧轉屋下來。
到該暗晡，頭家厥心臼（sìm kiù）睡到半夜，聽著鐵鍊佇地泥下拖寧行，lìd lìd liàg liàg響無停个聲，佢話著（va⁺ do⁺）係賊仔，就蹶亢（kièd hŏng）起來看看，無看無恁死，一看，仰仰呆忒去，嚇到目珠瞪到大嬤隻，講麼个看著厥家官分城隍廟个七爺八爺用手栲腳鐐（shiu⁺ kău giòg liău），頸筋落寧（làb nén）枷鎖（gà só）拉寧走哇，佢想毋知係發惡夢無？
第二朝晨，頭家睡到盡晝還吂亢，屋下人落佢間肚，看著眠床頂頭家个頸筋、手腕、腳腕全都烏青，過身忒毋知幾久咧。這係過後厥心臼講出來个，我滿叔聽了這事情个來龍去脈，佢摎人講，假使做積惡，梟人（hiàu ngin）確實會分神明責罰个事情，大家係知得，就毋會去害人，去梟人，去做該無天良个事情咧。
【註解】
- 贌人：租人。
- 當闊：很寬闊。
- 㧡：挑。
- 氣扯氣急：氣喘如牛。
- 大汗潑小汗：大汗淋漓，汗出如雨。
- 過了：多虧。
- 詏起來：爭吵起來。
- 黃榜：用黃色草紙書寫的狀子。
- 咒膏肓誓：臭罵。
- 貓舐朘：自討沒趣。
- 薪臼：媳婦。
- lìd lìd liàg liàg：鐵鍊拖地聲。
- 話著：以為。
- 蹶亢起來：爬起來。
- 大嬤隻：很大隻。
- 落寧（làb nén）枷鎖：套著枷鎖。
- 梟人：欺詐人。
