我公過身時，我正三歲，恁細，麼个都無印象，還毋知人我斯。我出世該兩時，係台灣光復前一年，當無好食，所有耕種出个米糧大部分都分日本鬼強強徵收走咧，春著个毋成東西，三餐食番薯籤，米飯愛過年過節正食得著，想愛食豬肉該還較毋使講咧。我姆降我時，做月買豬肉有配給，斯乜配給到一細料定定。聽我姆講，瘦个分我公割去，春該肥肥个正留分我姆煮酒食。
我公後生時，還係清朝手，該兩時，我公該輩屋下還盡有錢斯，屋前屋背歸大片山全係我太个產業。我太一心想愛栽培我公好好讀書去考秀才，希望以後好求得一官半職。我公從細就當煞猛打拼讀書，書讀著當好，吟詩作對樣樣來得，水筆字也寫著盡靚，經過幾多年咧，留下來个墨寶到如今還佇公廳壁頂吊寧。可惜，我公頭擺讀个書，到我讀小學時，毋知該係寶，全分我兜細人仔佇廳下神桌唇个拖箱拉出來扯來搞，扯到淨淨淨。
我公又較大咧，結婚了後，上艋舺（màng gă），就係這下个萬華啦，到台北去考秀才。該兩時，先愛到大溪坐船去艋舺。去時，身上戴寧盡多所費，歇到旅社寧，落考場又吂得時，衫袋肚錢還飽飽，分旅社肚个鴉片鬼zhe（引誘）著學食鴉片，該鴉片非常非常貴，一食就上癮，吂到考場，所費當遽就用燥忒咧，不得不轉來屋下，轉來時，斯背支鴉片煙笐（gong）定定。
轉來以後，鴉片煙癮一起，毋做事，斯癮食鴉片，鴉片貴蔘蔘，較多錢都用會忒，一群大細，愛食愛使愛用，煙癮一起，無錢就對人生死，像癲忒樣，錢也使忒，山也賣忒。我嬤無奈何，摎我公關間肚去，門外背用棍仔鎖寧。該兩時伙房屋都留有貓空，三餐愛食，就佇貓空窿落去，痾屎痾尿全佇該間肚寧。一日到暗斯聽著搥門撞壁，噦天噦地，有聲噭到無聲个聲哨（sàng său），不管佢生也好，死也好，我嬤全毋插佢，也無摎佢換衫，也毋分佢洗身，就恁樣關七日七夜，無聽著撞壁舂門（zhùng mun），噦噦嘶嘶个聲，斯聽著我公求我嬤放佢出來，我嬤正放佢出來。
恁樣以後，我公个鴉片煙癮總算戒忒咧，講係講戒忒，毋過，下把仔，還係會偷偷食一下，過過癮。我公食了鴉片了後，家產賣淨淨淨，斯春著一身債，我爸恁多兄弟日夜煞猛打拼做籃做簍（lúi），正摎債還忒，還摎賣忒个所在贖（shùg）轉來。這以早个世事，全係我兜大時，我姆摎我兜講个。
毋知愛仰般講正好，我公教漢書，我爸恁多兄弟，除了我二伯、三伯識字以外，我爸以下恁多老弟姊妹全毋識字。我當記得，我爸摎佢正學著个客語三言雜字念分我聽，「讀書子，寫字童，秀才父，狀元翁，四書熟，六經通，」，其他佢就毋過（gó）教我，過無幾久佢就過身忒咧，該年佢四十一歲，我六歲，我公已經過身三年咧。
【註解】
- 過身：逝世。
- 番薯籤：番薯剷成細絲。
- 後生：年輕。
- 清朝手：清朝統治期間。
- 水筆字：毛筆字。
- 艋舺：現今萬華。
- zhe：引誘。
- 所費：盤纏。
- 用燥忒：花光。
- 鴉片煙笐：鴉片煙筒。
- 貴蔘蔘：貴得要死。
- 大細：子女。
- 貓空：預留貓穿過用的洞。
- 窿落去：送進洞中。
- 聲哨：聲音。
- 毋插佢：不理他。
- 撞壁舂門：衝撞門牆。
- 噦噦嘶嘶：聲嘶力竭，不停大喊。
- 下把仔：偶爾。
- 毋過（gó）：不再。
