【文／賴傳毓】
雖然生死天註定 爺娘共樣在輪迴
爺娘恩情大過天 奉養爺娘愛及時
莫等爺娘歸天時 正來後悔噭毋轉
正所謂樹愛靜來 堵風堵雨靜毋下
子想爺娘來孝順 爺娘歸西無辦法
話講仙掃拂一下 來到凡塵一莊頭
莊頭地闊人無多 大體做田來過日
幾十年來無出事 親像日日過新年
莊內鄉親盡善良 勤勤勞勞來打拚
有閒就來打嘴鼓 村長不時鬥鬧熱
天南地北大家講 係有發生麻煩事
抑係發生好壞事 都會全力來𢯭手
今日張屋討心臼 大家扛桌又兜凳
屋下有肉就㧡來 屋下有菜就兜來
大家誠心來慶祝 鬧鬧熱熱到天暗
不知不覺過三年 莊頭南片黃家屋
九十六歲黃耆老 壽終正寢做喜喪
全莊男丁來𢯭手 搭棚佈置做靈堂
全莊婦女來𢯭手 有兜縫布做孝服
有兜幫忙來煮食 應付孝家摎人客
請來先生看日腳 做齋誦經兩三日
完山个日當鬧熱 歸莊老嫩來送行
希望耆老做神仙 話講村長屋外坐
閒閒來㗘煙筒頭 想着䃗崁吂有做
徐屋滿子吂添粧 邱屋大哥中酒毒
仰般勸話來戒酒 日日就為莊項想
極力幫忙來解決 鄉親儕儕看在目
大家尊敬又拍手 今日村長屋面前
忽然鬧熱人尖人 原來村長得公子
堵好今日做滿月 村長歡喜來辦桌
大家笑頭又笑面 莊項做下來幫忙
扛桌扛凳放禾埕 大魚大肉擔等來
豐豐沛沛大家吃 面紅濟炸打酒拳
星光半夜正結束 雨落日晒日仔過
村長公子張月華 隨等日仔慢慢大
月華十二歲時節 阿婆不幸歸西天
爺娘額結又煩惱 驚怕無人來照顧
喊出月華堂下坐 阿婆既經去做神
從今無人照顧𫣆 阿婆辛苦恁多年
直直渡𫣆渡到今 爺娘講愛來打拚
打拚賺錢同畜你 跈等就會讀國中
你愛煞猛來讀書 規規矩矩來做人
莫分爺娘無面子 月華頷頭無講話
話講月華開學後 每日爺來喊䟘床
每日娘來做便當 月華來到新環境
班項異多老同學 乜有毋識新同學
大家和挼共下過 上課月華準時到
下課月華準時轉 也會幫助屋下事
逐擺考試成績好 爺娘看到真放心
日仔一日過一日 真遽學期就結束
寒假一儕在屋下 無人做伴真無聊
行出屋下看光景 前前後後行一轉
每日看著無意思 漸漸行出本莊頭
行到河壩脣項坐 看到水來魚來泅
感覺生趣石頭丟 忽然聽著有人喊
月華翻轉頭來看 原來係同班同學
一個歇到東窩莊 姓趙安到趙運德
屋下開間雜貨店 一個歇到油樹莊
姓潘安到潘貴勝 阿爸開了打鐵店
還有一個同莊人 姓鄧安到鄧錦華
阿爸斗竹做簍賣 四人漸漸變結拜
真遽就到舊曆年 家家屋屋鬧棚棚
五燥五溼拜天公 豬肉雞肉來拜神
懇請所有過路神 保佑歸屋能平安
兜出牲儀拜祖先 上酒跌筊求吉祥
金銀財寶燒旺旺 三十暗晡團圓飯
豐沛飯菜歸張桌 全家大小來圍爐
食飽小孩田項搞 紙炮轟𪹚又𪹚地
寒假轉眼就結束 話講月華个爺娘
早出暗轉無在屋 村長透日就無閒
打早來做田項事 做了又有莊內事
月華無人來管著 好在月華頭腦好
逐擺考試成績好 盡壞交到該三人
四人打黨壞事做 罵人打人做了做
在學校肚規矩差 村民念在村長情
毋敢去同村長講 單淨教育細人仔
莫去招惹該四儕 看到四儕閃遠遠
恁樣顛倒還較壞 養蛇食雞膽變大
四儕緊來鬧緊大 學校先生尋家長
屋下總係無人在 先生不得不轉屋
路項看著這四儕 坐在河壩脣㗘煙
看著先生遽丟忒 先生搖頭大訓話
吩咐遽遽轉屋下 月華轉屋毋敢亂
表現盡乖來讀書 表面功夫做來靚
講話應對有禮貌 逐日準時去學校
放學轉屋無定著 總有理由騙爺娘
村長兩老真放心 放學狐群狗黨纏
月華既經毋讀書 成績緊來緊退步
有日月考成績單 交代爺娘愛簽名
月華成績看毋得 全身緊顫拿出來
村長看著大著驚 發閹訓話歸下晝
決定來去問先生 聽煞先生講分明
險險當場昏過去 目汁含等轉屋下
看著月華放學轉 掃把拿著就來拌
打一陣仔娘求情 娘親目汁流無停
目汁濫泔求月華 本本分分來做人
認真讀書出頭天 痛心嚴格訓月華
痛改前非重新來 正正當當來做人
莫害爺娘難做人 村長為了愛生活
本本天光做到暗 但係村長兩公婆
起頭特別來注意 早晨準時去學校
暗晡放學轉屋下 輕可事情也會做
暗看一段時間後 看著月華有正常
放心再過來打拚 吂知一駁仔過後
三個同學又來尋 死黨壞事又來做
開頭毋敢忒亂來 漸漸緊來緊好膽
甚至公開來哺煙 四儕共下欺負人
同學大家毋敢講 驚怕命就會無忒
更加惹事到別班 相打變成家常飯
全全就像毋王法 有日四人面結結
原來無錢來買菸 參詳結果真驚人
尋一個最弱同學 限定時間來搶錢
拿無就來盡命碰 這擺打到特嚴重
上課先生入教室 跈等就來發覺著
有人流血流滿面 就來詳細問原因
先生正問第一句 學生既經昏過去
先生嚇著送醫院 學校通知五家人
送醫細人个大人 堅持愛來報警察
警察詳細做筆錄 頭來尾去詳細問
問煞關到派出所 村長痛心看月華
就來求情帶轉屋 好好教訓摎教育
警察倒轉訓村長 愛教育早就好做
警察詳細講分明 傷害本係刑事罪
愛送法院來判決 村長一下膦火著
擎手就來賞巴掌 警察出手來阻擋
早無教來特慢了 受傷細人个阿爸
看著四儕小鬼仔 拳頭擎起就來打
警察極力來阻擋 講明傷害細人仔
同樣犯著傷害罪 村長跪下再求情
能將俫仔帶轉屋 認真處罰細人仔
警察還係緊搖頭 傷害勒索無單純
既經就係刑事案 我也既經無權放
單淨交分法院判 村長流淚轉屋下
傷心過度就中風 月華阿母來囹仔
來看月華毋敢講 愐到月華在囹仔
希望月華會反省 囹仔肚巷乖乖過
出來重新來做人 因爭月華身體弱
總係負責來把風 故所罪刑有較輕
判刑日期有較短 日仔一日過一日
有日獄警喊月華 若个阿姆來看你
月華看到阿姆來 目汁雙流跪阿姆
就問阿爸係無係 到今還係譴月華
月華阿母目汁流 抽胲當久正講出
自你抓入派出所 若爸跈等就中風
兩隻禮拜就過身 月華聽著昏落去
監官遽遽喊醫生 半點零鐘正救醒
該日厥姆轉過後 月華跈等人大變
逐日戇戇看天頂 自家一儕毋講話
日頭落山月光出 無知過了幾多日
獄警多少會愁慮 驚怕佢會想毋開
就來特別注意看 日仔過了有罅遽
今日天時烏陰天 獄警喊來張月華
今日刑期既經滿 監獄制服遽換忒
領轉暫放个東西 你就做得行出去
希望從今做好人 無希望再過看著
月華遽遽行轉屋 行入莊肚頭犁犁
毋敢擎頭看鄉親 行到屋前天暗欸
入屋牌位前跪拜 對等阿爸牌位噭
阿姆看到也傷心 阿姆軟心扶月華
月華企起看飯桌 粥一碗傍蘿蔔乾
月華又再跪阿姆 阿姆三餐恁衰過
三餐食苦毋盼得 天光月華就開始
整理荒廢个田事 再來欠數買雞仔
每日阿爸前行香 阿爸靈前求原諒
再求阿爸愛𢯭手 愛來補償老阿姆
愛來畜勇老阿姆 雞仔細義畜到大
有兜賣錢來還債 有兜養阿姆身體
田項禾仔大收成 賣到錢來做衫褲
要分阿姆穿燒暖 改善屋下盡全力
愛分阿姆過好日 莊項鄉親看在目
感心莊內所有人 經過這擺个教訓
鄉親擎香拜村長 天頂有知可放心
公子包尾有改變 𠊎等也會來幫助
希望村長來保佑 對月華愛个東西
相親乜會半相送 鄉親同月華做衫
送分月華阿姆穿 鄉親又來教煮菜
月華煮了豐沛菜 不但想改變傳統
封肉請教漢藥師 開出藥方共下煮
雞湯又請教鄉親 仰般煮來較餳人
愛分阿姆來安心 想分阿姆來相信
倈仔有痛改前非 有日月華聽人講
東窩莊內有一人 煮食無人比佢慶
月華決定去拜師 準備錢銀拜師禮
就來尋到東莊頭 尋到師傅邵光亮
見到師傅就跪拜 雙手奉上拜師禮
介紹姓名同住家 師傅詳細看月華
為何想來學煮食 後輩後生毋成人
壞事做盡坐囹仔 阿爸乜分𠊎害死
這下期滿出囹仔 看到阿姆變較老
下定決心從頭做 想愛補償老阿姆
希望多少減罪過 師傅冷眼看月華
能夠反省來改進 又會想愛來補償
師傅聽到月華話 滿意點頭就答應
先對簡單學起勢 三層豬肉絞綿綿
豆腐乾來切小垤 摎蘿蔔絲共下炒
三樣共下𤐙畀香 這下舊曆年正過
甜粄驚怕食到驚 拿來切到薄薄仔
標準盡好長條型 再來略下蒸畀軟
甜粄做皮捲香料 再用粽索來䌈緪
放入滾油烰畀脆 夾起放盤就完成
甜粄恁樣來變化 保證大家搶等吃
成品師傅包起來 帶轉交本阿姆食
食前粽索愛解開 又退月華拜師禮
將這錢銀來孝順 伸著孤栖个阿姆
月華流淚跪師傅 師傅扶起張月華
一再叮嚀張月華 轉去毋好再變壞
係有興趣歡迎來 月華目汁來捽乾
就來遽遽轉屋下 路上緊行又緊想
學到恁樣做法後 愛來仰仔來變化
好分阿姆食較爽 食來又更加康健
盡遽月華轉到屋 拿出盤碗放成品
兜入阿姆間房肚 想愛來分阿姆食
緊喊阿姆無反應 阿姆竟然過身仔
原來阿姆恁多年 每日想子想老公
食睡完全無正常 身體緊來就緊壞
月華真心想改變 嗄變做係扛飯菜
後悔既經特慢仔 正所謂老古人講
爺娘惜子長江水 子想爺娘擔竿長
孝順爺娘愛即時 莫等爺娘歸天時
正來想愛就忒慢 單淨後悔一生人
