《虛假个幸福》 文/賴傳毓（四縣腔）
正正當當來做人 互相尊重盡重要
歸肚邪念傷害人 天理難容早慢報
男女儕儕就平等 無人做得有特權
社會大家守規矩 國家正會傳千秋
南華山下日泉鄉 天時環境當湛斗
山排平洋來做田 還吂蒔田割禾時
食飽夜後搬凳仔 大家牛眼樹下坐
天南地北打嘴鼓 家家屋屋歡喜過
陳家堯柏討新臼 對方謝屋謝思芸
兩儕恩愛過日仔 老公打早落田做
思芸灶下乜無閒 蔥頭剝皮切細皮
同油共下鑊肚爆 爆到變黃油泌忒
放到濾紙濾到燥 香菇泡水浸到軟
蝦米浸水洗畀淨 豬肉剁幼調味道
鹽糖豆油白胡椒 用手扡勻加入味
芹菜同韭菜切幼 香菇蝦米水泌燥
浸過蝦米水留等 香菇切幼好 香
香菇蝦米入鑊炒 再來豬肉放入炒
炒到豬肉色變白 又放豆油白胡椒
再放浸過蝦米水 再淬米酒炒一下
倒入滾水白胡椒 再倒豆油煮到滾
另外鑊仔煮粄圓 粄圓漂起就撈出
放入香料个鑊肚 再加艾菜胡椒粉
韭菜芹菜蔥頭酥 煮滾切火兜上桌
舀到三碗放竹籃 擐到田脣路脣項
就喊老公暫歇工 共下先來食點心
兩碗兜分老公食 自家共下食ㄧ碗
食完共下打嘴鼓 寮到半點鐘過後
收起碗筷轉屋下 堯柏繼續做田事
思芸灶下過無閒 準備食晝碗公飯
拿出一个大碗公 碗底添飯再放菜
爌肉竹筍玻璃菜 還有煎一粒雞卵
盎肚再挾鹹淡菜 紅白蘿蔔細竻瓜
雖然逐日碗公飯 思芸都有做兩份
ㄧ份份量無恁多 因爲思芸較細食
還有會泡一壺茶 放入竹籃擐出去
共樣擐到田脣項 打開塑膠細布棚
地泥再鋪塑膠布 兩儕坐入布棚肚
共下幸福來食晝 日仔一日過一日
毋多知仔做阿爸 堯柏就有細人仔
好得人憎渡到大 俫仔較大讀高中
妹仔較細讀國中 一家四儕快樂過
今晡日係年三十 大家準備拜天公
五燥五濕又水果 長錢長金就來拜
懇請天神來保佑 闔家平安田事順
紙炮盡放逐惡運 歸群細人共下搞
初一拜過阿公婆 行到牛眼樹下坐
大家歡喜來拜年 臨暗仔思芸灶下
準備食夜豐沛菜 俫仔妹仔兩姐妹
灶下共下來 手 一步一步來學習
兩儕動作當生活 思芸心肚盡歡喜
全家共下來享用 初二全家轉妹家
初五愛拜財神爺 家家屋屋擐竹籃
共下來到財神廟 擺好貢品求財神
好分大家大賺錢 拜好來到牛眼樹
樹下共下打嘴鼓 天南地北滑痢肚
東莊頭謝屋文雄 帶等俫仔謝少安
大家互相來拜年 少安看著謝思芸
目珠擘到大嫲粒 緊看思芸無轉眼
思芸心肚毋爽快 遽遽就來先轉屋
目光影出年假 大家恢復平常日
耕田煮食過日仔 堯柏打田幾下日
打好就愛來蒔田 天光日開始蒔田
堯柏个田愛一日 思芸來到市場肚
碗公飯愛用个菜 點心愛用个材料
全部一擺買畀齊 轉屋就來先準備
切菜滷菜調搵醬 隔壁鄰舍婦人家
多人共下來 手 頭日打早鹹粄圓
臨晝仔就食鹹粽 配竹筍三層肉湯
再來食晝碗公飯 思芸盡心食頭腦
思芸公婆愛面子 毋想輸人答謝人
準備六菜配一湯 芹菜炒肉炆爌肉
有白有青炒花菜 青椒切絲炒魚脯
竻瓜鹽生做前菜 煎吊菜仔盡扯飯
鹹菜炆三層肉湯 婦人家一儕一擔
㧡到路脣喊大家 放下歇工來食晝
兩壺釅茶銷頭好 好得思芸過再擐
儕儕兜著碗公飯 食到嘴角翹起來
大誇思芸好手藝 大家又來打嘴鼓
臨暗仔又再準備 蘿蔔粄再加肉粄
切到細垤煎赤赤 好勢㧡到田脣去
再加排骨蘿蔔湯 儕儕食到盡爽快
蒔田圓滿來做好 為了愛答謝鄉親
熱情 手來蒔田 煮出豐沛請食夜
豬肉絞綿封苦瓜 長年菜炆四粗骨
紅蘿蔔炒玻璃菜 薑絲爆炒豬大腸
滷个菜心盡扯飯 滷菜多樣做冷盤
覆菜切幼蒸絞肉 肥湯來炆蘿蔔湯
豐豐沛沛歸張桌 食飽歡喜轉屋下
日仔一日一日過 有一日田事做煞
堯柏準備轉屋下 堵著妹仔放學轉
兩儕牽等共下行 路項妹仔問阿爸
這駁屋下附近仔 一個男仔人長透
企在路脣看 屋 懷秋識這儕人無
妹仔懷秋搖頭那 毋熟事該儕人
轉到屋下面前時 堯柏巡過四周圍
除忒少安無別儕 打了招呼就入屋
食夜堯柏講分明 吩咐大家愛注意
屋下周圍看一下 吩咐思芸日時頭
一儕在屋愛細義 日仔過了有罅遽
毋多知仔三隻月 割禾時節又到了
入莊頭間李家銘 米穀咬著已經熟
莊肚割禾排頭儕 莊項儕儕磨禾鐮
準備換工來 手 當晝歇睏食晝時
少安食到額頭皺 分人講佢無禮貌
少安碗筷擲地泥 李家銘拂手逐人
無欠你一儕人 大家安慰謝文雄
天暗時節就轉屋 大家無心來食夜
第二日天光過後 謝文雄帶等少安
向世大人會失禮 繼續共下來割禾
割禾割到半爛燦 風鼓忽然用毋得
幾儕人詳細研究 尋了當久無頭䌈
有人遽遽轉屋下 載來好个風鼓車
大家繼續來割禾 主人承蒙恁相惜
無人注意謝少安 少安行到風鼓前
這看該看又來試 先同阿爸講分明
石牯頂畫結構圖 說明故障个原因
正來講出修整法 希望阿爸分機會
少安真遽就整好 大家起勢來改變
少安毋過係一時 堯柏安慰謝文雄
因為風鼓有故障 故所有誤著時間
禾仔割好主人留 堯柏兩个細人轉
遽遽告別李家銘 大家大笑陳堯柏
堯柏笑請來原諒 改日答謝大家情
堯柏轉到屋下肚 懷秋講分阿爸知
時常屋下附近仔 繞圈行个男仔人
今晡日 有看到 大家著驚看懷秋
這儕人著麼介衫 跍在路脣風鼓前
堯柏點頭無講話 思芸緊張問識無
文雄大哥个俫仔 財神廟前看思芸
看人目神無禮貌 全家開始提防佢
時間過了幾隻月 少安感覺這家人
已經特別來防佢 少安還係毋改變
思芸屋下係做閒 屋前空跡來種菜
禾埕脣項畜雞仔 豐沛屋下桌面菜
今晡日輪著堯柏 田項禾仔愛收割
事前規畫配菜色 青菜雞肉屋下有
其他無个出去買 思芸昨晡日開始
準備大家碗公飯 因為尞日無上課
懷安懷秋乜 手 三色菜包蒸畀熟
青菜豆腐打卵湯 裝好早餐兜出桌
食飽落田起勢做 思芸三儕洗碗筷
再準備朝晨點心 鹹肉粄切到細垤
再煮一鑊鹹菜湯 裡肚加上豬旺仔
煮好擐到路脣去 犒勞辛苦割禾人
又再準備碗公飯 雞肉蒸熟剁細垤
細垤蘿蔔乾煎卵 滷蘿蔔乾開胃菜
竻瓜塞入豬絞肉 捲豆腐皮塞雜料
香料絞肉鑲豆腐 鹹菜豬肚來煮湯
碗公配好放竹籃 婦人家一儕兩籃
㧡到田脣來犒勞 辛苦割禾男仔人
臨暗仔思芸再㧡 蘿蔔粄摎芋仔粄
慰勞辛苦割禾人 大家做到日頭落
正來收起傢伙仔 老人家做到歡喜
山歌唱等轉到屋 一片 手擺桌凳
一片 手兜飯菜 豬腳煲到烏 紅
蝦米就來炒芋仔 多種料仔炸烰菜
玻璃菜炒紅蘿蔔 滷菜心摎細竻瓜
多種料仔切冷盤 還有特別注注文个
客家炒肉一定愛 思芸炒个真好食
今哺日食夜个湯 思芸外家功夫菜
菜尾湯摎西魯肉 兩樣就像大鑊菜
用料實在又當萋 豐豐沛沛一張桌
答謝鄉親个𢯭手 大家食到哈哈滾
酒拳山歌像過年 食飽大家就大贊
思芸手路實在好 講到今年个田事
莊項田事無閒時 真多家人个農具
毋係這壞就該壞 好得少安來整好
大家漸漸對少安 改變想法無譴佢
懷秋有日放學轉 看著阿爸茫有閒
坐到路脣等阿爸 拿出課本認真看
看到兩手爪頭那 少安對背尾行過
懷秋脣項坐下來 詳細解說分懷秋
最先懷秋有著驚 堯柏田項乜注意
看到少安無惡意 聽著說明恁詳細
乜無多餘壞動作 堯柏心安續做事
結束收起手項事 行向妹仔該片去
聽到少安教妹仔 道理實在又分明
心肚略下放寬心 食飽夜後真多人
又來牛眼樹下坐 大家又來滑痢肚
堯柏看看四周圍 並無看到謝文雄
就來講著臨暗仔 少安教妹仔讀書
有人表示毋相信 乜有人共樣堵著
自家屋下細人仔 乜有共樣个情形
大家對佢開始變 睹著開始相借問
乜肯佢教細人仔 田事較閒个時節
少安會教細人仔 大家共下唱童謠
又會雕刻極樂仔 摎細人仔共下搞
毋多知仔過一年 大家漸漸來改變
毋會再惱謝少安 田項肥料會無了
堯柏想去農會買 思芸吩咐續買菜
開出明細分堯柏 思芸送走堯柏後
擎起钁頭挽起籃 走到菜園來無閒
整理菜園又摘菜 少安坐在屋面前
鋸起弦仔唱山歌 遠遠注意思芸身
忽然聽著慘叫聲 發現思芸橫在地
遽遽走來扶起佢 發覺腳項爛一空
走轉屋肚拿藥箱 扶起思芸轉屋下
發現思芸腳著傷 代佢清洗摎處理
右手開始無規矩 思芸感覺有古怪
忍等痛苦閃等開 堵好堵著兩姊妹
放學共下轉屋下 聽著阿姆喊救命
遽遽走轉屋下看 看著少安對阿姆
欺負又傷害阿姆 懷文懷秋兩姊妹
遽遽就來擋少安 兩姊妹還細無力
無法順利救阿姆 懷文懷秋橫下去
既經毋會再停動 思芸緊張就大喊
好得村長幾下儕 共下附近來巡田
聽著思芸个聲哨 遽遽走來看分明
看著眼前个情形 跈等就來擋少安
思芸噭等搖兩儕 警察來到銬少安
又再喊來救護車 懷文懷秋送醫院
堯柏轉到屋附近 看著屋下恁多人
又有警察大著驚 遽遽轉到屋裡肚
看著地泥个書包 又無看著細人仔
喊無餔娘較緊張 緊張來問个警察
屋下發生麼个事 村長無奈講分明
看著脣項謝少安 擎腳就來蹬過去
警察遽遽帶入車 村長陪等陳堯柏
共下來到醫院肚 看著思芸三子哀
懷文額頭纏紗布 懷秋手腳纏紗布
思芸腳臂纏紗布 堯柏看著心盡痛
警察又來做筆錄 三儕大笐射注完
村長帶等轉屋下 半路市場有堵著
有人賣豬腳麵線 村長停下買四份
交分堯柏帶轉去 黏時就食來過運
第二日天光過後 村長再來看陳家
帶來一個壞消息 文雄知俫仔恁壞
心臟縮忒過身了 歸莊鄉親就道嘆
人在做來天在看 壞事莫做有評斷
毋係毋會有果報 係該時間吂有到
人人相處存善念 無人做得傷別儕
儕儕有權過好日 共享人間快樂情
