【客語文章】篇名：舂拚《海陸鄉野傳奇》（8） 作者：詹益雲

細細時 常會跈（ten） 姆去看姐公，見擺 姐公總係坐佇眠床唇交椅寧摎 姆講閒談，去時， 姆會買兜 姐公好食个東西，像水粄，九層粄這兜點心。逐擺去看佢，佢都係擎支水煙筒佇眠床唇該交椅座寧㗘菸，該兩時 正十空歲仔。煙筒頭輒輒愛換一細撮一細撮个菸草，底下係細水壺，細水壺个水乜愛常換。 姆常會摎 姐公換煙筒水壺个水，有時乜會 換菸草摎 姐公點菸。

聽 姆講，有擺 姐公閒閒坐佇廳下門檻頂 佢个水菸筒，突然間看著兩三個舂拚，就係 俚平常話會講，搶劫人个強盜啦。該兜舂拚行到廳下禾埕前大門時， 姐公惦惦，詐無事人樣，毋聲毋聲，斯緊捉寧該兜舂拚看，全無徙位，也沒出聲。該兜舂拚看著 姐公坐寧穩的的，仰全無驚个樣仔，毋像勢，走到尾瀉屎，以後也毋識聽講有人來搶咧！

聽 三舅厥倈仔講，頭擺 姐公後生時，禾埕前十張神桌排成一列，佢一躍（ciog）就躍過去，這事情 姐公過後從來都毋識摎人提起過，連 姆都毋知，這係 表兄弟講出來个。

【註解】

1.㗘菸：抽菸 。

2.輒輒：經常。

3.惦惦：靜靜地。

4.詐無事人：裝作若無其事。

5.毋聲毋聲：不吭聲。

6.走到尾瀉屎：落荒而逃。