逐年舊曆七月二十，新埔枋寮義民廟都有舉辦普渡法會，㓾（chi）大豬、做大戲、各庄頭都來普渡祭拜義民爺爺，來看鬧熱个人，人山人海，烏麻展笪，尖人都毋過。邊唇个燈篙，有兩三棧樓高，燈篙四向角頭圍寧，除了做法事个和尚，其他个人一概做毋得行落去。和尚坐佇燈篙下，著寧袈裟，擎支錫杖，面前放張細桌仔，頂背放本經書，法會開始後，和尚誦經，歸本經書誦忒，愛花當久時間。 我姐公後生時摎人做長年，後生條仔，毋驚神，毋驚鬼，佢識聽人講，鑽落燈篙下誦經个和尚袈裟裡肚去，看得鬼著，佢也想試看看阿哦，就䀯著（pu⁺ do⁺）和尚誦經，做毋得停該隻時間，偷偷鑽落和尚袈裟裡肚去。
過後，佢摎人講，佢鑽落和尚袈裟以後，看著仰般多个鬼，該鬼逐個斯乜成尺高定定，人多，鬼驚人踹（dio）著，專門佇人縫肚鑽來鑽去。有兜無頭林，有兜斯春一隻手，抑係講斯一隻腳，有兜無手又無腳个淨淨係。該兜鬼逐个肩頭都有一支香絲（sì）骨，像擔竿樣㧡（kài）寧，一頭一粒米。聽和尚講，該一粒米，像我俚人間一籮米恁多，該兩粒米就係兩大米籮咧，該係一隻鬼一年个糧食。又講，鬼斯吸收米个香氣定定，故所以講分鬼吸收香氣過个米，煮乜無味，又合當遽臭餿忒，就像樹根係歿忒，該頭樹仔兩下半就會死忒；又像牙神經係抽忒，該支牙齒毋使幾久就無用咧共樣。還講，頭擺相㓾，毋係剁（dòg）手剁腳，就係剁頭林，所以義民廟看著个鬼全係相㓾死忒个人，正會無手無腳無頭林。
頭擺普渡時，祭拜个大體係豬羊五牲（sàng）較多，現下緊來緊多用米做个大豬，時勢生著係恁樣，該係奈毋何个事情啊，毋知義民廟奉祀个神明食得慣無？
【註解】
- 烏麻展笪：形容眾多 。
- 燈篙：法會專用尾部留存之夜的長竹竿。
- 䀯著：伺機逮住機會。
- 踹著：踩著。
- 香絲骨：燒香後留下的細竹絲。
- 臭餿：食物腐臭。
- 五牲：祭祀用五種食品組合而成的祭品。
